SUMARBLÍÐA NÆSTU 2 VIKURNAR?

Veðurútlið næstu daga er nánast eins og í lygasögu. Í veðrinu höldum við okkur reyndar við staðreyndir, en nú veit maður ekki hverju skal trúa!

Nálægð háþrýstisvæðis næstu daga, sem að auki er staðsett á hárréttum stað, gerir það að verkum að á mest öllu landinu verður bæði hlýtt og sólríkt.  Eiginleg sumarhlýindi, fremur er vorhlýindi.

Hæðir eins og þessi sjást hér alltaf annað veifið, en staldra oftast stutt við. Nú er hæðinni spáð á þessum hagfelldu slóðum næstu 10 daga og hugsanlega lengur.

Fyrsta kortið sýnir spá næstu 10 daga (12. – 21. maí) um meðallegu hæðarflata 500 hPa þrýstiflatarins.  Háloftahæðin birtist þarna greinilega suðaustur af landinu og rauðu svæðin eru jákvæð þykktarfrávik eins og þau eru kölluð. Því rauðara – því hlýrra er loftið í neðri lögum.

Skilar sér sannarlega í hita nærri jörðu og frávikaspá ECMWF frá í gærkvöldi sýnir “blóðrauða” flekki yfir landinu, fyrst 12. til 19. maí og aftur (en ívið veikari) vikunni þar eftir eða til 26. maí.  Hitafrávikið er með ólíkindum eins og það birtist eða allt að 10 stig.

Tökum Akureyri sem dæmi. Þar er meðalhiti um miðjan maí um 6 til 7°C.  Þegar við bætast 6 stig við erum við komin með 12 til 13 stiga meðalhita.  Spáin fyrir Akureyri næstu 10 dagana t.d. á Bliku er einmitt á því róli!

En ekki aðeins það að háþrýstisvæðið beini til okkar mildu, eða öllu heldur hlýju lofti með tiltölulega hægum vindum, heldur er miðja þess það nálægt okkur að hér verður niðurstreymi lofts og því meira og minna léttskýjað.   Undanteknining á því er Reykjanes og suðurströndin hér austur með, þar sem þokkubakkar eða lágský koma með golunni af hafi.  A.m.k. annað veifið, mögulega einnig á höfuðborgarsvæðinu.

Eitt spákortið til viðbótar er líka mjög afgerandi. Það kemur úr öðru veðurlíkani en hin tvö, þ.e. GFS, hinu bandaríska. Sýnir uppsafnaða úrkomu til 24. maí. Nærri miðju háþrýstisvæðisins er ekki spáð nokkurri úrkomu og þar á meðal hér um austanvert landið. Mjög óverulegri vestantil.

En auðviðtað tekur þetta enda eins og allt sem gott er.  Vikuspá ECMWF gerir ráð fyrir breytingum nærri 25. maí. Hæðin koðnar þá niður og við tekur lágþrýstingur eða í það minnsta lágþrýstifrávik skv. spánni. Þá vikuna og fram yfir mánaðarmótin er spáð ríkjandi vindáttum á milli austurs og norðurs með hitafari nærri meðallagi árstímans að nýju.  Og með fylgir kærkomin væta, a.m.k. fyrir bændur og  ýmsa aðra.