SLÉTT OG FELLT – ÞÓ GÁRAR UNDIR NIÐRI

Letileg hæð er yfir Grænlandi. Hún ásamt lægðum nánast á „heimsenda“  lætur okkur veðurfræðingana fylgja þekktri spá-uppskriftinni og við  hálf-dormum yfir veðurkortunum.

En það má reyndar ekki,  því undir sléttu og felldu yfirborðinu kunna að leynast veilur og jafnvel djúpir pyttir!

Hálftakort í dag sýnir nokkuð fagra Grænlandshæð. Nærri  Tromsö í N-Noregi er hins vegar lægðardrag sem leynir á sér.  Það stefnir nefnilega rakleiðis til okkar úr norðaustri eins og kortaröðin sýnir. Um leið grefur það heldur um sig.  Á yfirborðskortunum er hins vegar ekki mikið að gerast  í þrýstingi og vindum.

En háloftadragið veldur uppstreymi og skýjamyndunum. Dragið fer skv. spáunum vestur yfir landið á sunnudag.  Þá mun snjóa á Norðurlandi og norðantil á Vestfjörðum  með NA-átt. Ekkert er þar sem kemur að óvörum!   Tökum eftir því á sunnanverðu landinu að á meðan spá er V-átt í 5 km hæð, blæs af A nær jörðu.   Svo mikil vindáttabreyting með hæð veldur uppstreymi og óstöðugu ástandi.

Veðurlíkanið leysir málið með snjókomubakka við suðvestanvert landið og öðrum við suðausturströndinni.  Mikil óvissa hvernig þetta kemur út. Til viðbótar kemur við sögu mikill hitastigull frá köldu landinu suður yfir 6 til 8 stiga heitan sjóinn. 

Spá ECMWF á seinni myndin gerir ráð fyrir því á mánudag kl. 12 að drag verði að sjálfstæðri lægð við Reykjanes og Snæfellsnes. Stutt þá í snjókomu vestanlands.

Athyglisvert er að bera saman gervigreindarspá (Gg)  Google á mánudag, en hana má finna má á spávef Evrópsku reiknimiðstöðvarinnar ásamt þremur öðrum slíkum tólum.   Gg-spáin er ekki ósvipuð þeirri reiknuðu skref fyrir skref. Fróðlegt að sjá hvor verður nærri raunveruleikanum þegar upp er staðið.