HVERNIG VERÐUR VORIÐ?

Flestir sem ég hitti þessa dagana spyrja:- og hvernig verður svo sumarið? 

Nokkuð langt í eiginlegt sumar og heil árstíð á undan, nefnilega vorið.

10 daga meðalspá ECMWF frá í morgun, sem gildir út apríl, sýnir mjög eindregna mynd. Hæðarsvæðið í suðaustri er á undanhaldi og vægi þess flyst til vesturs og yfir Grænland.  Í raun nýtt hæðarsvæði.

Við það skiptir um vinddátt í háloftunum.  Í stað hagfelldrar S- og SA áttar með mildu veðri frá því um mánaðarmót, tekur nú við NV-átt í 500 hPa.  Þetta er mikilvæg breyting og sést vel á fyrra kortinu. Það sýnir hæð 500 hPa flatarins og frávik. Eins og staðan birtist á kortinu að þá er hún “læst” og fylgir lágur flötur 500 hPa og með lágþrýstingi langt úti á miðju Atlantshafi. 

Fyrir vikið er NAO-vísirinn neikvæður og honum er spáð í þeim fasa út mánuðinn og fram í maí.  Umfjöllun var í gær þess efnis að svo lágt gildi NAO í apríl hefði ekki sést frá því 1995, en spárnar í morgun eru hófstilltari hvað þetta varðar.

Þrýstifrávikin í 10 daga spánni á seinna kortinu eru kunnugleg fyrir árstímann. Almennt séð hár þrýstingur á okkar slóðum og með háþrýstimiðju yfir Grænlandi.  En þó Grænlandshæðin sé oft áberandi á vorin, er henn nú spáð stærri og víðáttumeiri, en alla jafna.

Í umræðunni á netinu sé ég að sumir telja þetta ástand vera síðbúna afleiðingu af skyndihlýnunni í heiðhvolfinu sem varð um miðjan febrúar. Legg nú engan dóm á það, en fyrir skemmstu benti ég á nokkuð skýrt samhengi við MJO í Kyrrahafinu og afleiðingu þeirrar sveiflu við veður við N-Atlantshaf. Hægari bylgjur í V-vindabeltinu og aukið útsláttur þeirra að 10-20 dögum liðnum.  Tölulget samband er á milli MJO fasa 7 og neikvæðu gildi á NAO 5-15 dögum síðar.

Veðrið sem fylgir hér á landi:

Fremur svalt, en eiginleg vorhret ólíkleg.  Næturfrost regla, frekar en hitt, einkum um norðan- og norðaustantil og þar hæg framþrón vorgróandans. Eins dregur úr leysingu á hálendinu frá því sem verið hefur.  Í þurrara lagi verður sunnan- og vestantil, en kemur kannski ekki svo að sök, því nokkuð hefur rignt síðustu vikurnar. Þar hins vegar margir sólardagar.

Hvað um framhaldið ?

Greina má línu í mánaðarspá ECMWF frá í gærkvöldi, en dreifing safnspánna samt óþægilega mikil.

Hins vegar eru safnspá morgunkerslunnar nú 21. apríl, eindregnari. Sýnir þrjá möguleika í spá fyrir miðvikudaginn 3. maí. Allir gera þar ráð fyrir hæðarsvæði við landið og að mestu háþrýstisveigju í vindasvið háloftanna.  Þessi spá gefur ekki tilefni til breytinga.

Staðviðri eru tíð í maí og veðurlag sjaldan þrálátara. Höfum hugfast að meðalloftþrýstingur er að jafnaði hæstur í maí hér á landi og hann er einnig þurrastur allra mánuða.

Spárnar fram í maí ríma ágætlega við þann veruleika!