BRÁÐUM KEMUR BETRI TÍÐ...

..með blóm í haga ,

sæta langa sumrdaga,  kvað Halldór Laxnes í klaustrinu árið 1922.

Fyrir norðan er enn svalt, en alls ekki kalt og svo verður enn á morgun. Sólarlítið, en snjóinn tekur nú rólega upp!

Á þriðjudag mjakast hæðarhryggur í háloftunum inn yfir landið úr vestri.  Snýst í suðlægan vind þarna uppi á miðvikudag og því fylgir aðstreymi af mildu lofti.

Snjórinn hverfur þá fljótt og bleytan frá honum niður í jarðveginn, gerir það að verkum að fljótt sprettur um leið og hlýnar og sólin lætur sjá sig.  Umbreytingin gæti orðið undur skjót.  Blika spáir t.d. +16°C í Varmahlíð á miðvikudag og spárit Veðurstofunnar fyrir Akureyri og Egilsstaði sýna glöggt hve hitinn rís eftir morgundaginn.

En það er fleira á þessu spákorti sem vert er að gefa gaum. NV-stæður vindur og raunveruleg leiðindi sunnan lægðarinnar, þ.e.  á Bretlandseyjum og síðar einnig m.a. í Danmörku og í Niðurlöndum.  Ekki síður í S-Skandinavíu.

Fylgjast þarf með köldu lægðunum á norðurhjaranum og hvort þær taki á rás í átt til okkar. Sú fyrir vestan Grænlands gæti „verpt eggi“ eða totu af svölu lofti. Henni er spáð yfir S-Grænland og fram hjá okkur.  Önnur hæð  við St. Lawrence Flóa og lítið fer fyrir,  gæti myndað vænlegan hrygg og gert sig gildandi um komandi helgi (og 17. Júní) á okkar slóðum. Hugsanlega sem Grænlandshæð með ekki svo kaldri N-átt eða að hæðin nái austar og þá með blíðuveðri um mikinn hluta landsins.