„26 STIG Á EGILSSTÖÐUM Á SUNNUDAG“

Í morgunútvarpi Rásar 1 í morgun var þessi tala held ég endurtekin þrisvar sinnum til að ítreka spá Veðurstofunnar um allsvakalegt sumarveður austanlands á sunnudag. 

Við höfum fylgst með hlýju og sumarlegu lofti að undanförnu á sveimi fyrir sunnan og austan landið, án þess að hafa náð hingað að marki.  Nú eru hins vegar ágætur líkur á því að virkilega hlýtt loft komi og fari yfir landið.

Það kemur úr suðvestri og er einn angi hitabylgjunnar sem nú ríkir á austurströnd N-Ameríku.

Sjáum rísandi hæðarhrygg og hlýja bylgju í spám um háloftavinda. Á föstudagsmorgun er þannig gert ráð fyrir mjög greinilegri slíkri bylgju austur af Nýfundnalandi og suður af Grænlandi.

Þrálátur grænn liturinn á þessu korti það sem af er sumri,  verður þá enn yfir landinu. Sá litur vísar á svalt loft  og stutt í háloftlægðina. Á þessum tímapunkti líklega um 5 til 7 stiga hiti eystra.

En bylgjan rís áfram og ferðast til norðausturs. Berst hingað að Vesturlandi á laugardag og þar með sumarveðri, einkum á laugardagskvöldið. Yfir austanvert landið á sunnudag.  Með hýja loftinu léttir líka mikið til.

Hitaspárnar eru í takt við hitagæði loftsins, þykktinni spáð um 560 dam, sem alla jafna gefur við kjör aðstæður um 25 stiga hita þar sem hlýjast verður.

Blika spáir 20 stiga hita en hráspá og óleiðrétt spá frá ECMWF sýnir allt að 27 stiga hita síðdegis á sunnudag á Egilsstaðaflugvelli. 

En rétt er að vara við of mikilli bjartsýni – landvindurinn (S eða SV-átt) verður á mörkum þess að ná að halda nægjanlega aftur af hafgolunni norðan- og austanlands s.s. á Héraði.

Um 60 líkur eru á svo afgerandi spá í safnspánum frá Evrópsku reiknimiðstöðinni.  Hins vegar gengur bylgjan áfram hratt til austurs, svo aðeins verður um þennan eina dag að ræða og um að gera að nýta hann vel! 

- Allar líkur eru síðan á að svalt loft af einhverju tagi  nái aftur yfirhöndinni fyrstu dagana í júlí.