ÞINGVALLAVATN ÍSILAGT - FYRR EN OFT ÁÐUR

-Ekki er þó vitað hvort hann sé enn orðinn traustur!!

Þingvallavatn leggur seinna en öll önnur vötn. Það er vegna dýpis og hve mikið það er um sig. Það þarf að kólna niður undir +1°C allt niður á botn, áður en skæni tekur að myndast.

Á tunglmyd (hitamynd) frá því kl. 15 á nýársdag má sjá greinilega að Þingvallavatn var þá íslaust. Lagið á því er e.t.v. aðeins bjagað sem gæti bent til þess að það hafi verið byrjað að leggja.

Fyrir tilviljun var ég staddur á Valhallarplaninu að kvöldi nýársdags innan um 5-6 rútur af ferðamönnum í norðuljósaleit. Eiginlega var ég frekar í leit að grimmdargaddi eftir hátíðarnar! Þarna um kvöldið var 15 til 18 stiga frost og hægviðri við vatnið.

Næstu daga var minna frost og ský yfir - því sýndu tunglmyndir ekki vatnið ógreinilega eða alls ekki. Í gær, 4. jan. var bjart yfir mótaði ekki fyrir Þingvallavatni. Á miðnætti þann 5. var frostið 21 stig við þjónustumiðstöðina.

Vatnshitann sem sjá má á vef Landsvirkjunar og mælir hita í inntaki Steingrímsstöðvar fór undir 1,0°C, einmitt á nýársdag. Þá var vatnið tilbúið í ísmyndun skv. "reglunni" þ.e. ef gerir þá frost í hægum vindi. Þau skilyrði voru einmitt að kvöldi nýarsdags og þá um nóttina. Gefum okkur því að fyrsti ísdagurinn hafi verið 2. janúar.

Til er ágæt skrá um ísalagnir og ísabrot á Þingvallavatni alveg aftur til 1951. Reyndar er hún ekki alveg samfelld á sjöunda áratugnum.

Fátítt er að Þingvallavatn leggi fyrir áramót. Það gerðist þó 1974 og aftur 1981 í kjölfar kaldrar haustveðráttu. Veturna 78,79 og 1980 lagði vatnið öll árin ýmist 2. eða 3. janúar.

2010 var var Þingvallavatn á ís fyrsta dag ársins að loknum nokkuð langvarandi froststillum. Brotnaði þó upp aftur að viku liðinni.

Nokkra vetur á þessari öld náði vatnið ekki að kólna nægjanlega og ekkert sást til íss. Önnur ár aðeins skæni í nokkra daga og núorðið heyrir það frekar til undantekninga að traustur ís sé a Þingvallavatni á Þorra og Góu eins og reglan var flesta vetur var hér áður fyrr.